Чыста канкрэтна

Мора эмоцыяў, пабiтыя ногi i несусьветнае задавальненьне ад добрай гульнi атрымалi ўдзельнiкi футбольнага турнiру "За Свабоду й Незалежнасьць", праведзенага "Моладзьдзю БНФ" на школьнай пляцоўцы па вуліцы Захарава.

Першымi мерацца сiламi выйшлi каманды Маладога Фронту i Лiцэя iмя Якуба Коласа. Браты Iван i Iльля Шылы фактычна зьдзеквалiся з галкiпэра лiцэiстау Мiколы Лабковiча, прымушаючы яго выцягваць зь сеткi мяч за мячом. Некалькi разоу каманда лiцэя вырывалася з брамнiцкай зоны, але атакi нагадвалi хутчэй усхлiпы бездапаможнасьцi. Маладафронтауцы жартавалi, маўляў, "давайце вам лепш тэхнiчную паразу запiшам"... лiк 12:0

Малады Фронт	Коласаўскі Ліцэй	12:0
Завод ХЗ	Забей.info	0:2
Моладзь БНФ	Малады Фронт	0:5
Забей.info	Маладыя дэмакраты	6:0
Моладзь БНФ	Коласаўскі Ліцэй	1:1
Завод ХЗ	Моладзь БНФ	7:6(P)
Малады Фронт	Забей. info	1:4

У гэты час на суседнiм полi каманда iнтэрнэт iнiцыятывы Zabej.info спаборнiчала са школьнай менскай камандай "Завод ХЗ". Матч праходзiў у роўнай напружанай барацьбе, лiдэрства першых было амаль незаўважнае. Перамога 2:0 гарантавала "забейцам" праход у фiнал.

Наступны матч у гэтай групе закончыуся фiяскам для каманды "Маладыя дэмакраты", якiя, прайграючы 0:6, пагадзiлiся на тэхнiчную паразу i выбылi з турнiра.

Жарсьцi кiпелi падчас спарынгу "жоутых" ("Моладзь БНФ") i "чорных" ("Малады Фронт"). МФ годна трымаў абарону, не прапускаючы анiводнай атакi супернiкаў. МБНФ дзейнiчала па флянгах, i спрабавала штурмаваць контраатакамi. Першы гол маладафронтаўцаў стаўся фатальным, i гульня Моладзi БНФ пасыпалася. Гаспадары турнiра прайгралi 0:5.

Наступнымi гулялi лiцэiсты супраць Моладзi БНФ, якая па папярэднiм матчы была досыць стомленая i разладжаная, што не перашкодзiла ёй трымаць увесь матч пад кантролем. Лiцэй гуляу больш агрэсiўна, чым з МФ, неаднаразова турбаваў брамы супернiка, хоць i безвынiкова. Але ўдача i напорыстасьць дапамагла лiцэю выйсьцi на нiчыю 1:1.

За трэцяе месца змагалiся "Завод ХЗ" i "Моладзь БНФ", якая абышла лiцэй паводле розьнiцы забiтых-прапушчаных. Каманды абмянялiся галамi i фаламi, нiхто не хацеў прайграваць. 6:6 у асноўны час. Дадатковыя таймы ня вызначылi пераможцу, а вось лятарэя пэнальцi усьмiхнулася "Завод ХЗ".

Фаварыты турнiру "Малады Фронт" i "Zabej.info" сустрэлiся ў фiнале. Гульня была досыць роўнай, але эмацыйнай. Якраз пачаўся дождж, заўзятары разьбеглiся, i фiнал атрымаўся невыразным. Пад цiскам супернiкаў маладафронтаўцы адышлi у абарону i прайгралi 1:4, пакiнуушы золата футбалiстам дружыны "Zabej.info".

Пераможцы атрымалi залацiсты кубак "За Свабоду i Незалежнасьць", перавязаны бел-чырвона-белымi стужачкамi. А найлепшым гульцом названы Iльля Шыла з "Маладога Фронту"